Jump to Navigation

Mekele-Hara gebeya, Asayita-Tajura Railway Construction To Commence on September 2013

Published on: Wed, 2013-08-14 00:00
Image of railway line.

የመቀሌ ሐራ ገበያና የአሳይታ ታጁራ የባቡር መሥመር ግንባታ ፕሮጀክት በመስከረም 2006 እንደሚጀመር የኢትዮጵያ ምድር ባቡር ኮርፖሬሽን አስታወቀ።

ከአዋሽ ኮምቦልቻ ድረስ ያለው የባቡር መሥመር ግንባታ ፕሮጀክትም በተመሳሳይ ጊዜ ይጀመራል ተብሏል።

የኢትዮጵያ ምድር ባቡር ኮርፖሬሽን ዋና ሥራ አስኪያጅ ዶክተር ኢንጂነር ጌታቸው በትሩ እንደገለጹት ግንባታቸው ያልተጀመሩ የመቀሌ ሐራ ገበያ፣ የሐራ ገበያ አሳይታ፣ የአሳይታ ታጁራ እና የአዋሽ ኮምቦልቻ የባቡር መስመር ግንባታ ፕሮጀክቶች በሚቀጥለው ዓመት መግቢያ ይጀመራሉ።

ከአዲስ አበባ ሜኤሶ ድረስ ያለው የባቡር መስመር ግንባታ ፕሮጀክት 21 በመቶ የተጠናቀቀ ሲሆን፣ በተያዘው በጀት ዓመት ደግሞ ከሚኤሶ ኢትዮጵያ ወሰን ድረስ ያለውን የግንባታ ፕሮጀክት 23 በመቶ ለማጠናቀቅ ታቅዷል።

ከአዲስ አበባ ጅማና ከሞጆ ሞያሌ ድረስ ያለው የባቡር መሥመር ግንባታ ፕሮጀክት አፈጻጸም ላይ ፈታኝ ሁኔታዎች እንዳጋጠሙ ዋና ሥራ አስኪያጁ ጠቁመዋል።

ዶክተር ኢንጂነር ጌታቸው እንዳሉት በዕድገትና ትራንስፎርሜሽን ዕቅዱ የተቀመጠውን ሁለት ሺህ ኪሎ ሜትር የባቡር መሥመር ግንባታ በተያዘው ዕቅድ መሠረት ግንባታው ይጠናቀቃል።

በአዲስ አበባ ቀላል ባቡር መሥመር ግንባታ ፕሮጀክት በተያዘው የጊዜ ሰሌዳ መሠረት ግንባታው እየተካሄደ 43 በመቶ ለማሳካት መቻሉንም ገልጸዋል።

የአቡነ ጴጥሮስ ሐውልትና በምሥራቅ ምዕራብ አዲስ አበባ የሚገነባው የባቡር መሥመር ግንባታ በወቅቱ የውኃ መስመር ባለመነሳቱ በግንባታው ላይ መጓተት ማስከተሉን ተናግረዋል።

ፕሮጀክቱ በስምንት ምዕራፎች ተከፍሎ እየተከናወነ ሲሆን፣ በተያዘው በጀት ዓመት ግንባታውን 80 በመቶ ለማድረስ መታቀዱን ዶክተር ኢንጂነር ጌታቸው ገልጸዋል።

በአሁኑ ወቅት በአዲስ አበባ ከተማ በመጀመሪያው ምዕራፍ 32 ኪሎ የቀላል ባቡር መሥመር ግንባታ ፕሮጀክት ተከናውኗል ያሉት ስራ አስኪያጁ ከግንባታው የሚገኘውን ልምድ በመቀመር ተጨማሪ 32 ኪሎ ሜትር የቀላል ባቡር መሥመር ግንባታ ለማካሄድ ታቅዷልም ብለዋል።

የኮርፖሬሽኑን የማስፈጸም አቅሙን በማጠናከር ረገድ 19 ባለሙያዎችን ወደ ሩሺያ በመላክ በባቡር ኢንጂነሪንግ ሁለተኛ ዲግሪ ደረጃ እንዲሰለጥኑ ተደርጓል ብለዋል።

ከአዲስ አበባ ዩኒቨርሲቲ ጋር በመተባበርም 500 ለሚሆኑ ተማሪዎች በባቡር ኢንጂነሪንግ በሁለተኛ ዲግሪ በማሰልጠን በ2006 አጋማሽ ላይ ሥራ ይጀምራሉ ተብሎ ይጠበቃል።

የአዲስ አበባ ቀላል ባቡር መስመር ፕሮጀክት ግንባታ ከአንድ ዓመት ተኩል በኋላ አገልግሎት መስጠት ይጀምራል ተብሎ ይጠበቃል ሲል ኢዜአ ዘግቧል።

Source: Ethiopian Radio and Television Agency (ERTA) 



Main menu 2

Lambadi Software Developer P.L.C