Jump to Navigation

Ashegoda Wind Farm To Be Launched Due Saturday

Published on: Thu, 2013-10-24 00:00
Image of the Ashagoda windfarm

120 ሜጋ ዋት ሃይል የሚያመነጨው የአሸጎዳ የንፋስ ሃይል ማመንጫ ፕሮጀክት የፊታችን ቅዳሜ ይመረቃል።
ፕሮጀክቱ ግንባታው በሁለት ክፍሎች የተካሄደ ሲሆን የመጀመርያው ክፍል ከነሃሴ 21 ቀን 2003 ዓ.ም ጀምሮ 30 ሜጋ ዋት ሃይል ማመንጨት የጀመረ ሲሆን፥ ቀሪው 90 ሜጋ ዋት ሙሉ በሙሉ ስራው ተጠናቆ ለአገልግሎት ዝግጁ ሆኗል።
የመጀመርያው 30 ሜጋ ዋት ባለ ሁለት ምላጭ ተርባይን ያለው ሆኖ ከፍታውም 70 ሜትር ያለው ሲሆን፥ የአሁኑ የ90 ሜጋ ዋት ደግሞ ባለ ሶስት ምላጭ ተርባይኖች ታሉት ሲሆን፥ ከፍታው 80 ሜትር ነው።
ቅዳሜ የሚመረቀው ሁለተኛው ምዕራፍ የንፋስ ሃይል ማመንጫ ዲዛይኑን በማሻሻል 1 ነጥብ 67 ሜጋ ዋት ተጨማሪ ሀይል ተገኝቷል፤ በአጠቃላይ 84 ተርባይኖች ተተክለዋል።
የአሸጎዳ የንፋስ ሃይል ማመንጫ አጠቃላይ ከፍታው ከባህር ወለል በላይ ከ2200 እስከ 2560 ሜትር ይደርሳል።
የኢትዮጵያ ኤሌክትሪክ ሃይል ኮርፖሬሽን የህዝብ ግንኙነት ሃላፊ አቶ ምስክር ነጋሽ በግንባታው ሂደት የውጭ ሃገር ባለሞያዎች መሳተፋቸው ለእውቀትና ቴክኖሎጂ ሽግግር ጥሩ አጋጣሚ የፈጠረ መሆኑን ተናግረዋል።
የፕሮጀክቱን ግንባታ ያከናወነው ቨርጅንት የተባለ የፈረንሳይ ኩባንያ ሲሆን፥ 210 ሚልዮን ዪሮ ወጪ ተደርጎበታል።
የሚመነጨውን ሃይል ወደ ብሄራዊ የኤሌክትሪክ ማከማቻ ማዕከል ለማስገባትም 37 ኪሎ ሜትር ርዝመት ያላቸው ባለ 33 ኪሎ ቮልት መካከለኛና ባለ 230 ኪሎ ቮልት ከፍተኛ የኤሌክትሪክ ማስተላለፊያ መስመሮች ተገንብተዋል።
አቶ ምስክር ባለ 65 ኤም.ቢ.ኤ ትራንስፎርመሮች ለስራው ዝግጁ መሆናቸውንም ተናግረዋል።
የአሸጎዳ የንፋስ ሃይል ማመንጫ ፕሮጀክት ሃገራችን እያከናወነች ያለችው የአረንጓዴ ሃይል ልማት አንዱ አካል መሆኑን የህዝብ ግኑኝነት ሃላፊው ይናገራሉ።
በአሁኑ ጊዜ ከንፋስ እየተገኘ ያለውን ሃይል ስንመለከት ደግሞ የአዳማ አንድ እና አሸጎዳ አንድ ላይ 171 ሜጋ ዋት የኤሌክትሪክ ሀይል እየተመረተ ነው ።
እስከ 2007 ዓ.ም ይገነባሉ የተባሉት የንፋስ ሃይል ማመንጫ ፕሮጀክቶች ጥናታቸው ተጠናቋል፤ ፕሮጀክቶቹ የሚገነቡትም በአይሻ ፣ በመሰቦ ሃሬና ፣ በአሰላና በደብረብርሃን ሲሆን፥ 542 ሜጋ ዋት ሃይል ያመነጫሉ ተብሎም ይጠበቃል።
Source: Fana Broadcsting Corporate (FBC)



Main menu 2

Lambadi Software Developer P.L.C